PIWULANG WARNA-WARNA

KIDUNG SAPELE

Apa mulane, kidung sapele, bisa gawe trenyuhing ati, ngelam-lami, angangeni, apa baya ta wadine ? Layake karana isi sastramilir, purwakanthi, kridhaning rasa-pangrasa, obahing jiwa manungsa.

Al Qur’an : II/261

Wong kang kanthi ihklas ngetokake bandhane miturut dalaning Allah, iku bebandhingane kaya dene nyebar wiji sa-elas, banjur thukul acawang pitu lan saben pang metu wohe satus iji. Lan Gusti Allah bakal nikelake ganjaranNe tumrap umate kang dikersakake, Jer Gusti Allah iku pancen Maha Murah lan Maha Priksa.

PASTHIKA RASA

Lelaraning awak lan lelaraning ati iku panggonane ing ilat.

Sing sapa temen marang awake dhewe, ora bakal goroh marang wong liya.

Bebasan mung sakedhap netra manungsa iku bisa ngebrukake wreksa kang gedhene sabuta kang umure wus ma-atus-atus taun.

Antarane kaluhuran karo kanisthan iku mung sajangkah dohe.

PIWULANG SAKA KI HAJAR DEWANTARA

Piwulang saka Ki Hajar Dewantara:

Agama iki piwulang, kang ing tataran kapisan mulangake bab anane Gusti Kang Maha Kuwasa, kang ngatur kanthi sampurna sakehing kang ana, sarta netepake anane urip langgeng sawise uriping manungsa ing donya iki.

Ing tataran kapindho sakehing agama iku mulangake kuwajibaning manungsa tumrap ing lair lan batin laras lan piwulangane Ka-Tuhanan mau. Akhire ing tataran kang kaping telu, nganakake tatanan mungguhing tumindake kuwajiban mau.

Senajan dhasare kabeh agama iku padha, nanging sarehne ana cara (“stelsel”) utawa dhapukan-dhapukan tartamtu, mula lawasing lawas kapercayan batin (religie) iku banjur dadi agama kang tumata (godsdienst).

Marga saka iki saya suwe timbul tatanan-tatanan khusus kang mbedakake agama kang siji karo agama liyane, uga ing bab etika utawa wulangane, malah ing ndalem kapercayane dhewe-dhewe, saya suwe katon prabedane ing anatarane agama-agama mau. Malah ing agama siji uga asring ana beda-bedaning paham, nganti nuwuhake anane sekten utawa lairan-aliran.

(sumber saka BURATSARI)